曹仁超：全球信用卡利率repricing（2008.12.15）

Alex

　　12月14日，周日。滙丰已向信用卡借贷者提出加息，代表大银行唔再支持消费者透过信用卡借款增加消费，美国花旗等大银行亦宣布加息；即全球信用卡贷款进入高息期。借钱消费不但不应鼓励，甚至系造成呢次泡沬经济嘅部分原因。依家全球唔少信用卡贷款已升到36.33厘，Repricing乃大势所趋。

　　恒生指数熊市一期响10月27日结束，道指熊市一期响11月21日结束。熊市二期策略系trading唔系投资。每一个成功投资者都应该有自己嘅一套。例如去年牛市将尽时，采用三七分、止蚀唔止赚、沟上唔沟落就系我老曹嘅一套，虽然未必系最好，但我老曹用咗三十几年。

　　美股反弹未完成

　　有人认为依家牛市已重临，我老曹反而担心港股正进入漫长熊市（呢个熊市不但时间长而且十分冷，因我地只好刚完成熊市一期。

　　很久以前，大概喺1970年，我老曹亦信奉价值投资法，利用基础分析，趁低买入后揸到佢地超贵才出售，以为系赚钱最佳方法。我老曹喺1974年7月又再开始收集和记企业，当年股价已由43元跌至7元，仲唔算低？到1974年12月我老曹已揸住十万股和记，市价每股1元，当年森池兄致电我老曹话，佢听到和记可能宣布破产，滙丰正计划挽救！从此我老曹再唔信乜嘢价值投资法而改信走势，例如移动平均线、RSI等。1979年9月金价进入RSI超买区，我老曹亦学人抛空，点知金价再升，触及止蚀位，5万元资本响一星期内冇晒。我老曹另一位从美国回来嘅好朋友（RSI就系1978年佢从美国带回来香港教我老曹），佢唔信邪而加空，金价不但由350美元升上450美元超买区，而且再升上560美元；佢唔服气再空多几手，金价再升上650美元佢又空，到720美元一星期再加抛空。唔使几耐，金价响1980年1月见850美元，佢父亲死后留畀佢嘅遗产780万元三个月内化为乌有。佢唔知喺边度搵到把斧头，将自己办公室内两部电脑劈开泄愤。各位知唔知1979年780万元可买几多嘢？答案系十层豪宅！眼见朋友滑铁卢后，我老曹从此亦唔再尽信走势，呢几十年渐渐建立起自己嘅一套，就系「论势、论战与论性」，背后思维嚟自中国「太极图」（阴盛阳衰、阳盛阴衰；白中有黑点、黑中有白点），希望他日有人将之系统化及电脑化而成为Trading system，令其他冇四十年投资经验者亦可运用。

　　上周五美元由最高价回落4.7％，兑日圆更见十三年内最低价。上周五全球股市因美国参议院唔批准bailout三大汽车集团而一度大跌，反而美股却低开高收，听讲过年后另有新方案，即不救、不救还须救！12月系咪美元强势结束嘅日子？

　　11月21日起美股表现不俗。技术上睇，美股反弹仍未完成，后市短期仍睇好。2002年美国已出现「泡沫大转移」，即科网股泡沫虽然爆破，但另一个更大嘅泡沫叫地产泡沫又开始。今时今日我地却见唔到泡沫大转移现象出现，爆破咗嘅地产泡沫在萎缩，但未见另一更大泡沫形成，反而消费者借贷泡沫酝酿爆破中。

　　Citadel投资宣布暂停Kensington及Wellington两只基金交易至明年3月31日止，因今年两大基金亏损49.5％；11月30日止今年美国对冲基金平均亏损18％。

　　高通胀已系今年上半年嘅事，自从7月油价回落后，通胀压力迅速消失，反而通缩压力渐增。路透／Jefferies商品指数由今年7月至今回落71％，油价由147美元至今跌咗67％。美国零售业连续五个月下跌，11月跌1.8％，至3556.6亿美元（10月份跌2.9％）；唔包括汽车11月份跌1.6％（10月份跌2.4％）。

　　进入拣股日子

　　1924年美国最畅销书由Edgar Lawence Smith所写，叫The Mantra of Buy and Hold。1935年最卖得嘅书由Gerald Loeb所写，叫The Battle for Investment Survival，强调采用10％止蚀，策略系进、出股市（in-and-out）。去年9月我老曹推出《论势》一书，亦强调何时进、出股市为主，至今亦成为本港畅销书之一；反之，毕非德??价值投资法今年却受人攻击，情况同1935年相似。点样处理你已缩水嘅财富？如希望牛市重临才再投资，你可能有排等，可能系三五七年，甚至十年八载亦唔奇。今年11月起策略应系进、出股市。TARP计划令美国大银行可以继续经营落去，但无法扭转大方向，只系延长衰退期。熊市二期策略系「你贪心我担心，你担心我贪心」，即当大部分人恐慌时入市，当大部分人贪心时离市，做一位成功??Bargain Hunter。Down ? Yes! Depressed ? No！今年我老曹自己亦Down 20％，但冇因此沮丧，仍有勇气再战江湖，上月开始又再做Stock-picking。Shelby Davis 1947年才开始投资（当年佢系自由作家，三十八岁，资本5万元），1994年过身之时，留下遗产9亿美元，即四十七年内佢??财富升值一万八千倍！由此可见只要你好好处理自己嘅投资，成绩亦可以好好。2008年快过去，金融海啸下，大部分投资者人仰马翻，日后对投资嘅戒心会好大。展望2009年，金融海啸渐随2008年而过去，一如沙士疫症随2003年而消失；2008年11月开始进入拣股嘅日子。另一投资大师Feldman嘅「Law of Depression Investing」（不景气投资法）认为，股价如喺低位日子好长而能够唔破产者，便迟早会上升！UCLA Anderson Forecast报告（上周五出版）估计，美国今年第四季GDP将跌4.1％，明年第一季GDP跌3.4％，第二季跌0.8％，最恶劣日子应系今年第四季。

　　今年投资者面对百年难得一遇嘅金融海啸，沪深Ａ股跌幅60.85％，远超过恒指跌幅46.6％，但仍非全球最差，因冰岛及俄罗斯股市后来居上。次按危机令高杠杆比率嘅雷曼兄弟破产，引发全球金融海啸。今年对投资界而言肯定唔系好时年，甚至最出色嘅投资经理亦有亏损（抛空者例外）。

　　美国仲有多个泡沫酝酿爆破

　　1983年我老曹曾写过「危机」要拆开来睇，即系「危中有机」，并鼓励港人买楼。2009年又如何？经过去年11月至今年10月（十二个月）下跌后，股价肯定十分便宜，问题系明年否会更便宜？便宜唔系买入理由，只有嗰D日后有升值机会嘅股票才值得买！如睇势，2009年势头仍然唔多好，美国楼市泡沫爆破睇落有排都未搞掂。Nouriel Roubini认为，美国出现近五十年来最大一次衰退，家吓不但未见底，而且另一泡沫信用卡、企业债券及州政府债券（muni）亦进入爆破期。所有OECD国家经济可能硬着陆，新兴国家GDP增长率大减速，最早复苏亦要到2010年甚至2011年，未来GDP增长率只有1%至5%，令复苏似有若无。债券大王格罗斯认为，全球投资者账面上亏损达30万亿美元，长达半世纪嘅杠杆经济唔可能喺一年内便搞掂，未来复苏之路艰辛难行。耶鲁大学Robert Shiller认为，1995至2000年标普五百指数上升三倍后，科网股泡沫爆破，至今年11月止只较2000年低60％；反之，1924至1929年美股上升三倍，到1932年回落80％以上。今次跌市跌幅仲唔及1929至1932年，理由系联储局急急减息，令利率好快接近零。2000年美股P/E一度达四十四倍，依家已回落到十三倍，低于过去平均P/E十五倍，但1932年P/E系六倍。Oppenheimer??Meredith Whitney认为，2008年系股市冲击经济，2009年反过来经济冲击股市，即经济情况愈来愈差，令股市抬唔起头。Wilbur Ross认为，美国业主已损失5万亿美元市值，超过一千二百万个家庭陷入负资产，令消费不振，响楼价未企定之前，美股牛市亦唔会重临。

　　继续吃喝玩乐等复苏

　　睇嚟2009年投资者仍要稍安毋躁，炒炒上落市，静候复苏来临，最好都系吃喝玩乐为主，2010年再玩过。

　　中国中央经济工作会议提出明年拟实施大规模减税计划，包括减企业及居民税费负担去刺激内需。清华大学中国财政与税收研究所所长白承恩话，减税已系财政政策重点之一，但唔会划一减税，而系有加有减，着眼推动经济结构调整。11月份中国出口下降2.2％，系七年来首次负增长，扩大内需已成当务之急。明年1月1日起实行增值税转型（由生产型转向消费型），短期内可减少企业税负担1200亿元人民币，加上今年下半年已提高个人所得税工资薪金税、暂停储蓄存款利息所得税、降低股票交易印花税及单边徵收住房交易税等，研究中仲有取消出口关税（包括钢材、化工品、粮食、化肥），另实施燃油税、环保税及资源税。

　　全国发展改革工作会议中，国家发展改革委主任张平响会上提出，除支持三农外，亦重点支持钢铁、造船、汽车、石化、轻工、纺织、有色金属、装备制造、电子资讯九大产业，以保持明年中国经济平稳增长。

　　银监会主席刘明康认为，美国金融机构损失尚未完全暴露，依家已公布嘅亏损只有3万亿美元。美国流动性依然紧张，滙市、债市、商品市场仍处剧烈动荡期。全球主要经济增长大减速，部分已进入衰退；中国经济受冲击下亦难独善其身。全球由高杠杆、高风险、高回报期走向低杠杆、低风险、低回报期，日子将十分漫长及痛苦；即使中国经济恢复增长，亦将系U形而非V形。银行嘅策略系救急、救穷不救乱；公司治理问题多多者不救，财务表虚假者不救。

　　保监会主席吴定富宣布，将提升保险资金进入股市比例，加大投资力度，由家吓8％提升到15％。可见中国政府正从多方面救市。