曹仁超：反弹就快见高潮（2009.05.11）

Alex

　　5月10日，周日。上周股市表现如雨后春笋，大量利好言论又再涌现，包括：一、经济唔再坏落去；二、刺激经济方案开始生效；三、股市快升穿年线（250天移动平均线）。人们已忘记3月9日嘅悲观情绪。

　　2000年科网股泡沫爆破后，需要三年时间才复元；呢次CDO问题咁快便搞掂?!2008年10月嗰次反弹维持四十九个交易天，呢次反弹如果亦系四十九个交易天，高潮便喺5月20日。历史上最长嘅反弹市喺1930年美股，曾维持六十五个交易天。

　　劣股升幅更胜良股

　　3月份美国消费者信贷减少111亿美元，因失业率上升及银行收紧信贷；由2007年高峰至今，美国消费者共失去2.55万亿美元信贷，较估计中大三倍。响咁嘅情况下，经济可以复苏咩?!

　　《黑天鹅》作者Nassim Nicholas Taleb认为，2007年10月开始嘅环球经济危机较1930年代更严重，因为家吓全球经济更紧密地连在一起。纽约大学教授鲁宾尼认为，政府估计第三季及第四季复苏未免太乐观矣。经济收缩速度在最近两季的确放缓，但相信今年及明年GDP仍然系负增长。Taleb教授认为，依家最大威胁系通缩，政府不断注资，可暂缓通缩压力，但已令金价、铜价及油价响今年内回升。中国政府刺激方案可避免经济陷入衰退，但中国经济过分依赖美国同欧洲，最终仍然难以幸免。

　　3月9日开始嘅反弹，至今为止基础良好嘅股份平均升幅32％，基础极差嘅股份平均升幅68％！上述情况已清楚告诉大家，呢次系熊市二期嘅大反弹，而唔系牛市一期。上升理由系炒家入市，唔系投资者入市。上述数字应可回答大家边个喺5月份入货?!

　　VIX指数由今年1月嘅57点回落到5月初嘅34点，代表散户由恐慌转为乐观。如VIX回升到40点，代表反弹市玩完。各位仲记得去年10月贝南奇估计美国衰退会响圣诞节后结束吗？结果系美股今年1月6日起又再回落。呢次佢保守D估计衰退喺今年第三季结束，结果又会点？世上冇人拥有预测能力。各位请记住，Easy Money时代已结束，今天已变成Easy come, easy go。

　　佛学精神系接受无常，因为无常就系现实，现实经常变幻，非人的主观愿望可改变，亦不应企图改变，更加不应企图知道未来系如何改变，一切顺应而行——人类唯一可做系放开自己思想接受现实，接受未来系不可预测（同「论势」精神相似）。

　　点解地产出现boom & bust？奥地利经济学派认为系政府将利率降至正常水平之下，上述喺Irving Fisher响1933年出版嘅Debt-Deflation Theory of Great Depressions已有说明。1920年代因利率低于通胀，最终引发1930年代资产负债表通缩；1980年代日本及90年代日式经济又再印证上述理论；1990至1997年嘅香港地产及1997年至2003年香港又再证明。Friedrich Hayek教授争拗上述情况正喺美国重演，即2003至2007年利率低于正常水平，引发2008年资产负债表通缩。2008年开始嘅金融危机系由资产价格泡沫爆破引发，由Great Moderation变成Great Unraveling，最终系Great Recession（因自律方面失控到无法解决困扰，最终引发衰退）。史丹福大学John Taylor教授亦认为，呢次泡沫爆破嘅远因系由2001年联储局降低利率开始，相信2008年开始嘅资产负债表通缩将维持一段几长日子。消费者对产品唔再感到饥渴，因为佢地已经冇蚊年消费，令今年第一季世界贸易量下降31％，成为世界经济嘅致命伤。喺恒生指数接近或略破250天移动平均线嘅今天，大家请保持冷静【图】。

　　利用保历加通道制订策略

　　大摩亚洲区首席分析员罗奇认为，响中国政府刺激下，A股由去年10月开始急升，相信今年5月亦应见顶回落，因为2007年唔系1997年，更加唔系2000年。中国政府唔可能将第三产业由占中国GDP 36％，一下子提升到50％。我老曹相信，A股走势系W形而非V形，即去年10月到今年5月完成上升后又再回落，然后又再上升。各位可利用大部分人乐观出货，以及利用大部分人悲观入货，将股票市场变成阁下嘅提款机（ATM）。请利用保历加通道（Boillinger Bands）协助自己制定买卖策略；保历加通道喺上落市最有用。如能加入W％R（Williams percentage range）及阴阳烛便更好。相信企业纯利周期今年见底，而股市走在经济之前，因此唔排除去年10月及今年3月指数见底，但见底唔代表之后一定系繁荣。

　　本港银行3月份贷款减少1.7％（较一年前减少3.6％），而今年首季系2000年3月以来最大嘅单季跌幅（减少3.6％）；其中又以贸易及财务跌幅最大，达15％；地产及建筑跌幅最细，只有1％。3月份零售业少7.7％（减少9.3％）；存款上升1.6％（较一年前减少0.6％），未见有经济复苏讯号。

　　中移动（941）购入台湾第三大流动电话公司远传电信12％股权，令台湾股市今年出现过去十八年内最大升幅。台股指数已由去年11月21日3955点升上最近嘅6400点，升幅62％，唔少人估计年底可见7500点甚至9000点……。三通力量真系咁大，令跌咗十八年嘅台股重返牛市?!上周由温家宝主持嘅国务院常务会议已原则上通过《关于支持福建省加快建设海峡两岸经济区之若干意见》。此区与台湾仅一水之隔，北承长三角洲，南继珠三角洲；加上福建省和台湾人血缘相亲，一旦大力发展，必可吸引台湾资金大量流入，成为继珠三角、长三角后另一沿海经济带，促进两岸互利共赢，提高经济发展水平。所谓海西经济区，包括浙江南部、广东北部及江西部分，包括建福省九市、浙江温州、丽水、衢州；江西上饶、鹰潭、抚州、赣州，以及广东梅州、潮州及汕头。

　　台股熊市结束言之尚早

　　上述《意见》通过，将令中国海峡两岸经济带形成，实力将不断增强，与台湾经济优势互补，为经济繁荣提供宽广发展空间。喺香港上市嘅海西区有关股份上周已起动，估计闽台之间嘅物流、石化、现代农业、LCD、LED等科技产业转移及台资企业借壳上市，将带来新景象。不过，因此而认为台湾十八年熊市结束，似乎太早咗D。4月份台湾出口减少34％，系连续第八个月回落，主因系美国、日本及欧洲经济不景，令台湾高科技产品出口呆滞，只有向中国大陆出口才上升5％。未来台湾产品能否透过出口大陆而复苏?!依家内地LCD平面电视机显示屏需求十分大（台湾响呢方面已系全球第三大出口地区）。中国开放海西经济区，可令台湾高科技产业移向内地，但到时能否带动台湾服务业上升则系疑问。

　　2000年及2007年开始嘅两次衰退，都系因泡沫爆破。2000年嗰次透过大量增加货币供应而解决了，呢次又能否成功?!估计2009年美国财赤相等于GDP 12％，加上金价已重返900美元之上，前景有D令人担心（英国财赤已达GDP 12％，但经济仍乏起色）。分析家指出，今年美国企业纯利较去年平均回落35％。

　　响熊市中有唔少反弹市，情况有D似玩过山车。你不但需要有健康嘅心脏，同时要有冒险精神，例如响人人睇淡嘅3月9日入货，喺人人睇好嘅5月份又再减持；与响2008年11月入货、喺2009年1月沽货一样。在熊市二期中必有一次（或以上）接近或略破250天移动平均线，即恒指17500点附近极有可能系呢次反弹嘅极限。Follow the Smart Money而唔系Big Money，因为大户亦常常睇错市。请注意，美国长债由去年12月起一直回落（太多卖家），令长期利率上升，虽然美国联储局2月份曾入市吸纳。历史不断喺我地眼前重演，例如1990年日本房地产、1997年第三季开始嘅香港、2006年下半年起嘅美国，但我地往往视而不见。圣路易联储银行主席James Bullard上周估计，失业率好快会见9％，并希望喺可见将来唔会超过1982年嘅最高峰10.8％。佢十分担心类似1990年代嘅日式通缩响美国出现，而联储局已再冇弹药对付通缩呢头怪兽；前路颠簸可以肯定。国会财政预算局估计，2011年政府负债相等于GDP 54％，而毕非德估计可达80％（即到达冇经济繁荣嘅水平）。

　　见底唔代表可以睇好

　　毕非德话，最恶劣嘅经济情况已经过去，呢点我老曹亦同意，但见底并唔代表可以睇好。去年毕非德旗下公司投资减值160亿美元，包括响爱尔兰两间银行投资亏损89％（因为佢希望捞底）及2008年8月油价高峰期吸入ConocoPhillips。证明圣人都有错，何况毕非德？我地应学习佢嘅智慧，而非盲从佢。毕非德并认为，美国房地产及零售业仍未见复苏讯号。

　　另一知名人士罗杰斯响去年睇淡花旗系啱嘅。佢认为，美国经济衰退期可能长达七至八年。不过，佢去年睇淡美元证明系错，至于睇好农产品亦错得好交关（尤其系糖）；罗杰斯去年购入咗加拿大Agcapita Farmland及巴西Agrifirma。我老曹都系信我阿妈多D：佢认为务农嘅人世世穷！记得1973年农产品价涨价时，亦有朋友跑去澳洲买农庄，结果蚀本十几年才打和出番嚟。今年3月9日罗杰斯喺新加坡嘅投资论坛上公开睇淡美股，起码短期系错。佢话自己唔系timer，而且系因为联储局入市买长债才令跌市延迟出现（any excuse is better than none）！请将你嘅水晶球抛入垃圾桶，承认人类系冇预测能力吧！

　　雪茄伏系奥巴马其中一位经济顾问，佢认为2月份开始嘅政府7870亿美元刺激方案，已成功阻止美国经济进一步下滑，唔需要另一方案。雪茄伏相信，经济由今年第二季起可稳定下来，但同时认为唔少工种例如汽车制造业及金融服务业可能一去不返。即使经济复苏，呢方面嘅就业情况亦唔会改善，情况有如1981－82年失业率一度上升至10.8％才回落，但唔少耐用品生产业工种却一去不返（同1981年6月比较，约14％耐用品工种从此消失）。嗰D四十岁或以上失业人士即使减薪20％，仍无法搵到原先从事嘅工作，因为1981年起美国工业进入downsizing期。同样情况2000年喺科网行业出现，受害者系嗰D从事电脑软件嘅人才，唔少工种亦永久失去。2008年起汽车制造业及金融服务业面对同样问题。

　　CBS集团主席Sumner Redstone认为美股牛市今年3月已开始。Amway创办人之一Rich DeVos认为，今时今日应了解「Power of Positivity」（正面力量）。惠誉估计，今年全球GDP萎缩2.7％，少数例外系金砖四国，估计仍升3.2％。

　　汤森路透5月4日调查显示，分析员估计今年第一季标普五百纯利跌35.1％（4月1日跌36％），即分析员进一步修正睇淡。5月1日止已有三百二十六间公司公布业绩，66％较估计中好，9％符预期，只有25％较估计差。

　　日本银行估计，日本今年GDP萎缩3.1％，明年将恢复增长。

　　John F. Wasik认为，美国住宅楼价进入「迷失世代」。因为美国就业职位每月失去六十万。接受联储局调查嘅银行有45％表示已收紧楼按，而去年12月有一千九百万间房屋空置。经过四十年美国消费不断上升后，2008年起进入消费萎缩期，因为1965至76年出生嘅人口只有四千四百万，加上手上财富唔及1946到64年嗰批婴儿潮多，当婴儿潮进入卖楼期，而X世代进入买楼期，强弱就好明显。上述情况喺2007年已开始，相信将一直维持落去……。

　　投资组合策略员David Tice喺2007年10月系少数认为股市见顶嘅分析员之一，上周佢喺彭博电视发出警告，认为美国股市喺未来可回落54％，理由系长达二十五年嘅牛市早已结束。呢次熊市并非另一次Garden - Variety Inventory式衰退，而系绵绵不绝嘅衰退，即呢次衰退没完没了。响伦敦嘅Bill Bonner认为呢次熊市中，每次当人们开始乐观时，股市便再开始回落。呢次亦唔例外。

　　智者千虑，必有一失；愚者千虑，必有一得。最聪明嘅人都有睇错市嘅一天；最愚蠢嘅人亦起码有一次系睇啱嘅。因此应追随趋势，而非预测后市。