曹仁超：切勿睇得太淡（2008.11.21）

Alex

　　11月20日，周四。10月27日恒指由10676.29开始反弹，系咪已于11月5日15317点结束？至今仍未肯定。今天恒指再跌517.24，收12298.56；成交446.17亿元。恒指已回落前升幅61.8％，如周五止跌回升，大市仍有机会见底。11月期指跌438点，收12197点，代表周五反弹机会极大。

　　楼市料明年下半年见底回升

　　受全球金融海啸冲击，香港地产股响今年跌幅超过45％，部分跌幅更超过75％；资产净值折让也超过50％（即未来本港楼价甚至再下跌30％，地产股现水平一样有得守）。我老曹认为，香港中小型住宅（豪宅除外）抗跌力应较以往强，理由系：一、依家供楼利息便宜；二、新楼宇供应有限，估计跌市将喺明年第二季完成，明年下半年出现止跌回升机会极大；三、本港上市地产开发商过去几年都冇加大收购土地嘅力度，手上可开发嘅土地储备有限，冇一间需要贱价卖楼。2008年唔同1997年，当年香港炒楼风气甚盛（中产阶级一般揸住三个单位，一个自住、一个出租、一个用来炒）；2008年中产阶级除自住外，拥有另一个单位作出租者已唔多。最近嘅炒风由去年10月开始，今年5月结束，前后只有八个月，以此计算，楼价低潮如非今年12月就系明年2、3月（如恒指喺10月27日见底，楼价低潮就喺12月；如恒指明年第二季见底，楼价低潮亦将喺明年第二季）。

　　去年11月我老曹曾警告——勿睇得太好，今年11月我老曹再警告──勿睇得太淡。一般所谓专家，家吓十个之中已有九个睇淡，一如去年10月通街都系股神。今天连美国正牌股神毕非德亦被人down-grade！

　　今天日经平均指数下跌6.9％、南韩Kospi指数跌6.7％、台股跌4.5％、新加坡跌3.4％。沪深三百指数跌1.06％，见1932.43。

　　美国10月份CPI较9月份跌1％，甚至核心通胀亦回落0.1％（虽然仍较去年同期上升3.1％）。美国经济又再面对通缩威胁，令道指下跌3％。五年前美国面对通缩威胁，被格蛇同贝南奇联手击退（上次策略系2003年年中将利率降至1厘），依家又面对相同问题。贝南奇相信，美国陷入通缩嘅机会唔大。

　　东京柏克莱资本公司分析员Kyohei Morita认为，日本正步入通缩期，估计2009年7月开始。由于日本银行无法再减息以对抗，只能眼白白睇住通缩明年降临。

　　英国第二大地产投资基金British Land占伦敦金丝雀码头11％权益。估计上述项目截至今年9月30日止只值1.12亿英镑，较上季下跌40％，主要受雷曼兄弟公司破产事件影响。

　　仲有三十五天就系圣诞节。上周公布嘅美国10月份零售跌2.8％（其中汽车减少5.5％、零售减少2.2％，汽油扣除价格下跌亦减少1.5％），系连续第四个月下跌。上述情况只有响1974年才出现过，唔通呢次系1973至74年翻版（去年10月消费信贷升500亿美元，今年10月消费信贷升5亿美元，即借钱消费已较一年前减少90％）？

　　2005年透过物业再按揭用作消费嘅资金6950亿美元，占美国当年GDP 3％；2007年已下降至4700亿美元，占GDP 2％；2008年第一季系487亿美元，第二季95亿美元，第三季又点？失去每年来自物业再按揭嘅资金支持，美国消费市场会点？11月16日嘅调查报告显示，今年圣诞节计划增加消费嘅人占10％（去年25％），减少消费嘅人占59％（去年32％）。

　　美汽车业唔值得救

　　格拉咸教出本世纪最成功嘅投资者毕非德，令价值投资法扬名四海，例如P/E、市价与账面值关系、派息率（Price／Dividend Ratio）等等。到咗今年，价值投资法信徒却一再撞板。从前毕非德先生代表成功嘅投资者，但今年佢嘅投资表现又的确几令人失望，尤其系9月份佢接受《纽约时报》访问时话相信系买入嘅时候，9月25日佢用咗50亿美元投资高盛，家吓账面损失47％；10月1日投资30亿美元响通用电气，账面损失37％；仲有9月30日前买入八千三百万股Conoco Phillips，依家跌幅亦超过30％。

　　通用汽车主席1953年1月响国会上发言：「What’s good for the country is good for General Motors.」作为1941至53年通用汽车主席，佢曾为美军提供大量机动设施，并响1953年获总统邀请出任国防部长，正是「得势一条龙」。同样系通用汽车嘅CEO，今天却要到国会乞求bailout，不然通用汽车便要走上破产命运。面对高油价威胁（虽然7月份起油价已由147美元回落到53美元），你仲有兴趣买食油量大嘅SUV咩？面对金融海啸，三大汽车厂能否继续蚀本卖汽车，然后喺分期付款中赚取利息差？纯经济角度睇，美国汽车业系唔值得救（至于政治理由则不在讨论范围）。通用汽车CEO瓦戈纳本周仍坐价值3600万美元嘅私人飞机去华盛顿国会（私人飞机每飞一次耗油2万美元，如改坐航空公司经济位只需288美元，坐头等亦只需837美元）。福特CEO穆拉利架私人飞机便宜D，只值2800万美元，佢住喺西雅图而非底特律，因此每周五晚上坐私人飞机返屋企，然后周一早上又飞回底特律返工！佳士拿CEO纳尔代利亦拥有私人飞机，呢次亦系坐私人飞机到华盛顿国会……。三大汽车公司嘅高级职员亦可享用公司飞机；例如福特汽车便有八架公司飞机供高级职员享用（包括接家人去度假），情况有如AIG（有公司机队，唔系一架而系一整队！当政府向AIG注资850亿美元，AIG高级职员仍坐私人飞机去度假）。

　　信贷泡沫爆破后，须调整嘅何止美国同英国楼价，好多项目都需要下调，例如高级餐厅消费及奢侈品。eBay计算所得，响美国家庭内可搵到总值3200美元其实并唔需要嘅物件（例如买入后只用过一次甚至从未用过嘅，可以放上网拍卖）！相信香港情况更甚，本港女士平均每人拥有超过十个手袋，只有其中两三个经常用，其余七、八个只用过一次或两次……；男士们平均有十套西装，亦只有其中两三套会成日穿……。上述物件嘅作用只有一个目的，就系「炫燿性消费」（Conspicuous Consumption）。

　　经历过1974年熊市打击后，我老曹同妻子有一个协议：就系每月生活开支不得超过每月薪金收入。大部分人日常生活所需其实唔多，但欲望则无穷。三十三年过去，我老曹一直严守呢个规定，即家庭开支只可来自薪金收入，投资回报则留作「不时之需」，因为呢方面收入来源太唔稳定。上述规定限制咗我老曹嘅个人欲望，而令家庭一直过住好简单嘅生活──既无华衣美服，亦无豪华房车，甚至出国旅行亦好少。有时谂番：有几多人将生活所需与个人欲望混淆不清？例如美食唔一定系鹅肝、鱼子酱，好多时餐蛋公仔面亦好美味，尤其系肚饿之时。有朋友曾请饮过价值数万元一枝红酒，老实讲，我老曹唔识贵在哪里?!亦坐过朋友过百万元嘅保持捷跑车，但我老曹仲系喜欢坐的士，因为够方便。生平最怕上朋友嘅游艇，因我老曹唔爱水上运动，上咗船都唔知做乜好。

　　金融从业员面对供应过剩

　　2008年快将过去，今年真系令人难忘。美国五大投资银行：雷曼破产，贝尔斯登、美林被收购，大摩与高盛改为商业银行。未来次按危机风暴过后，金融市场将同以前唔一样。政府新加入嘅监管条件将陆续出台，过去大量利用杠杆恐怕难再出现，部分有问题嘅金融工程（financial engineering）亦唔会再应用。保险公司如非被重组就系被整固，未来金融行业再唔系利润特别丰厚嘅行业。大量对冲基金消失，亦令金融从业员面对供应过剩（一如2000年科网股泡沫爆破后电脑软件人才嘅命运一样）。

　　至于房地产失去金融业杠杆化支持，又冇金融工程协助，会否再出现由1994至2007年式上升？唔排除重返九十年代以前嘅模式。

　　美国银行CEO刘易斯周二响底特律经济学会上话，美国经济肯定进入衰退，最早复苏2009年年中。过去美国楼市好景喺建基于政府补贴及极低利率，未来上述情况唔会再出现。

　　欢迎各位进入Great Unwind时段！过去一年全球股市减值30万亿美元，相等于美国两年GDP，未计美国房价减少5万亿美元，仲有公司债券大减值。1987年起格蛇透过宽松信贷制造多个泡沫，当信贷泡沫爆破后，此法已唔可行（今年9月24日联储局资产10万亿美元，11月14日已上升到20万亿美元，不足两个月增加10万亿美元信贷，仍无法支撑起股市）。好多人认为信贷咁快速增加，一定会出现通胀，但今时今日却出现通缩，因为联储局创造信贷嘅能力唔及信贷市场萎缩速度。物业、汽车、消费市场销售额均大跌。

　　资本主义制度一如民主政制，并唔完美，但却系人类最有效运用资源嘅方法。资本主义制度令人有选择工作嘅自由、响乜嘢地方做工嘅自由，以及何价买入何产品嘅自由（唔少人因此响高价接货），亦让有才能嘅人可以才能交换金钱。最近由于过分自由而变成狂野继而闯祸，并非资本主义制度有问题，而系政府对金融市场缺乏监管造成泡沫。

　　泡沫爆破后调整期有长有短，只要社会仍尊重资本主义制度，最终有一天我地会再次由衰退走向繁荣，只系呢一次较以往几次都长。