曹仁超：学习上落市中搵食（2008.11.29）

Alex

　　11月28日，周五。恒生指数升336.18，收13888.24；成交423.69亿元。12月期指成13988点，升408点，高水，代表后市可进一步睇好。

　　花旗推介沪杭甬高速（576），估计今年每股获利47.5仙，较去年减少2.4％，P/E六点八倍，目标价5元。

　　沪深三百指数跌2.17％，收1829.92。11月26日人行决定下调一年期人民币存贷款基准利率1.08个百分点；12月5日起下调存款准备金率1个百分点，但沪深指数11月27日只微升，28日又下跌。到底上述公布系利好抑或利空？

　　截至家吓为止，人行已减息三次，一年期定存已下降1.62个百分点；相信中国经济到明年下半年将再现曙光。估计明年一年期存款利率将降至1.44厘，不过2009年CPI可能系负0.1％，即实际利率仍高。

　　呢次减息令五年以上贷款利率降至6.12厘，对购房人嚟讲最低贷款利率更可低至4.284厘，系十年内住房按揭贷款利率最低嘅水平。对首次购房者而言，月供减少412元；对持有二套房贷者而言，月供更下降722元，有助刺激购房需求。客观因素正在改善中，但政府态度能否转化为老百姓嘅置业欲？主要睇能否改变老百姓对房价进一步下降嘅预期，要大部分人都唔信楼价会再跌，情况才可扭转。

　　股市方面，今年第四季上市公司业绩仍下降，例如电力、钢铁、航空、化工、地产、纺织等，相信需要一段日子A股指数才能稳定下来。

　　1986年10月14日，纽约证券交易所董事长约翰．范尔森来中国访问，邓小平赠送咗一张面值50元嘅上海飞乐音响股份有限公司股票畀佢。呢次系中国最高领导人第一次向世界发出明确讯号：中国要发展股份制度！有咗股票，麻烦同时出现，例如到边度交易？要唔要设立证券交易所？有咗证券交易所后，中国仲算唔算社会主义？就算决定发展证券交易所，中国却冇证券法……。响一片争论中，深圳股票交易所已暗中成立，1990年5月25日到6月27日，深圳市五只上市股票都涨疯了：深圳发展升100％、万科升380％、原野涨210％、金田涨210％、安达涨380％。全世界记者都来了，外国记者问深交所首任负责人王健，家吓有冇公司法、证券法、会计法，以及过户处响边？问到王健口哑哑。响咁嘅情况下不得不请示中央。1990年11月，当年大旧江坐飞机到深圳倾咗两个多小时，最后决定股票市场还是要保留下去。有咗呢句话，深圳证券交易所1990年12月1日正式开业；为保险起见，开业典礼订喺1991年7月3日。反而上海证券交易所却老实不客气响1990年12月19日正式开业，爬咗深圳头。

　　虽然交易所已开业，但争论仍然不休。1992年春天邓小平南巡讲话中指出：「证券、股市这东西究竟好不好？有没有危机？是不是只有资本主义才可以有、社会主义能不能用？都要坚决地试。看对了，继续搞下去；看错了就纠正，纠正不了关了就是。怕什么？」有咗邓小平呢段讲话，交易所便放心搞落去。

　　1992年8月7日，由中国人行深圳分行、深圳市工商局、公安局、监察局联合发布《1992年新股认购抽签发售公布》，新股上市以公开抽签决定。8月9日及10日两天，新股申请表发出五百万张，每张100元，结果全国各地人民都嚟深圳排队攞抽签表。8月10日，攞唔到申请表者开始示威、游行，焚毁公安人员值勤巡逻车。最后中央喺1992年10月20日由五部分组成国务院证券委员会，由上海朱出任第一届主任，由财政部借出200万元租咗一间办公室，中国证监会宣布成立，由刘鸿儒出任第一届主席。1993年第一部证券法出台，同年12月29日《中国公司法》颁布，到此中国证券交易才有咗雏形。1995年年底，国务院领导去到上交所，留下八字题目：「法制、监管、自律、规范」。到1999年6月2日，国务院发布《期货交易管理暂行条例》，期货第一部法规产生了。

　　未来经济呈U形反弹

　　中国股票市场由最初「暗中操作」到「坚决地试」，到依家监管，已走过十八年。家吓面对嘅国有股减持而引发大熊市，未来日子如何？一如1992年第一届证监会主席刘鸿儒讲：股涨上头有意见、股跌下面有意见；不涨不跌人人有意见，有时做人真难。目前情况只有继续走着瞧。所谓「开弓没有回头箭」，只有往前看，是好是坏亦要走落去，依家面对全球金融海啸，亦已无法回头。

　　美国汽油价格由7月17日4.11美元跌到感恩节嘅1.9美元，四个月内回落54％。一般美国人每年行车一万四千哩，以每加仑行二十里计，依家汽油价格即每年可节省1400美元。油价下跌，对美国人而言刺激大于今年5月同7月嘅退税计划；加上股市过去十二个月跌幅逾40％，令投资吸引力大增。一来一回条数点计？未来投资环境正在改善中，但一般人反而睇淡（去年11月却睇好）。

　　统计数字证明，大部分散户最喜欢高买低卖。我老曹1967年刚离开学校之时有5000元身家，一位亲戚却有100万元。四十年后今天，我老曹相信自己手上嘅财富已超过嗰位亲戚。最大分别系佢经常患上非理性亢奋及情绪低落症，当全世界人睇好时佢亢奋，当全世界人情绪低落时佢亦低落。我老曹嘅投资策略则经常反其道而行，例如去年11月睇淡时畀人闹，今年11月叫人「唔好睇得太淡」一样畀人闹，理由系我老曹并冇加入「Groupthink」俱乐部；远离群众，做个寂寞嘅分析员。

　　我老曹估计，未来经济系U形反弹而非V形；因此只认为恒指10676点已有得守，愈多人闹，愈证明我老曹睇法正确。

　　2007年10月至今嘅投资市况，系我老曹一生中少见财富消失速度咁快。虽然我老曹已采用三七分，即只用30％资金投资，仍可以喺十二个月内水瓜打狗，其他投资者伤成点可以想像，即使今天面对股票超便宜亦失去胃口。今时今日，值得强调嘅再唔系点样保护你嘅财产，而系点样响上落市中搵食。

　　学习反向思维、学习财务分析。我老曹从来唔信「画画吓」就可以发达；我老曹唔否定走势分析嘅用途，但切勿将走势讲到天下无敌。世界上冇一个有钱佬系靠睇走势发达嘅（卖走势分析搵钱者就大把）。一如投机同投资，一般人以为揸长线就系投资、短线就系投机，观念上完全错误。揸长线可以系投机（例如去年10月到今年10月），揸短线亦可以系投资（如方向正确）。投机系指喺投资之前唔做功课；如事前做足功课，响十拿九稳情况下才出击就系投资。唔做功课，无论揸长线或短线都系投机；反之，去年11月抛空亦可以系投资，理由系抛空前已做足功课，才决定做一只醒目嘅熊。我老曹最憎读者问攞冧巴（自己唔做功课，如果咁都可以赚到钱真系天冇眼，蚀本则系应该。股票市场85％系输家，咁唔小心谨慎嘅投资者又点会系赢家？）。一般人喜欢听「误导分析」，例如蚀本就长揸、迟早升番，而唔喜欢听真实说话──例如止蚀唔止赚。另一句误导系「明天会更好」！1974年7月我老曹入市后，等咗一百八十天才发现「明天将更差」！任何亏损一旦达15％便立即止蚀，No question asked！从前沙田有块石叫望夫石，她的丈夫出海捕鱼可能浸死咗，但她天天仍上山望夫归，最后变成石头丈夫仍不归。作为爱情故事系好动人，作为投资者则好戆居。

　　英国消费信心跌至三十年内新低，11月份英国楼价出现连续十三个月回落，估计12月4日英镑将减息至2.25厘。

　　奥巴马的决定左右全球气候

　　OPEC周末开会讨论减产，今天油价再跌1.2％，成53.79美元。油价已到咗十字路口，如美国人愿意放弃揸SUV呢类食油量大嘅汽车，改用食油量细嘅日本车或欧洲车，未来油价将喺50美元一桶或以下，同时废气排放量减少有助环保。美国三大车厂申请破产保护，日后改为生产悭油私家车，放弃生产食油大怪物，脱胎换骨，一样可赚大钱。如奥巴马为咗政治理由而作出经济不正确嘅决定，只有令全人类继续捱贵油。

　　明年11月响哥本哈根召开嘅第十五届全球环保会议，认为全人类如唔改变依家嘅消费习惯，到2012年地球将走上不归路。全球气温可上升摄氏六度，引发全球气候大灾难。奥巴马如真正关心环保，请唔好支持美国三大车厂生产怪物，以免2030年发生地球气候大灾难。今天低二氧化碳排放汽车响技术上已发展完善，美国人因为汽油太便宜，才继续浪费汽油及污染大气层，一如三大汽车巨头仍然坐私人飞机返工一样咁浪费。

　　政治家系讲一套做一套嘅人，领袖亦系讲一套做另外一套者。分别系政治家无论佢讲乜嘢，但总系做错；反之，领袖甚至讲错咗仍然做对。例如罗斯福同列根系领袖，而尼克逊及殊仔却系政治家。至于奥巴马系政治家抑或领袖？唔在乎佢讲乜嘢，而在乎佢上台后所做嘅事响事后证明系啱系错而已。

　　全球最大商品基金BlackRock World Mining Fund认为，未来几年商品价格仍然低沉，包括马来西亚嘅锡到南非嘅白金、澳洲及巴西嘅铁矿砂甚至煤（如美国汽车工业进入重组），BlackRock估计商品价格低迷最少维持三至五年。

　　Deleveraging嘅威力令原材料贸易失去信贷，只有大量抛售套现，造成过度供应及减产。估计未来经济系Ｕ形，即股市已见底，但经济继续往下沉，而复苏可能系三几年后嘅事。世界唔会出现大萧条，但衰退难免。拣股游戏今年11月又开始。

　　今年感恩节嘅祷告：感谢上帝，今天自己不但仍然健康，而且still solvent！不要叫我们受到试探，仍然相信揸现金，直到最恶劣日子已成过去。亦为政府代祷，希望他们明白派钱不能令经济复苏，只有改善营商环境及提升市民教育水平，才是达致经济繁荣之本。月有圆缺，天有阴晴，经济有繁荣有衰退，愿做官的明白──大气候与小气候不因你们派不派钱而改变，浪费纳税人嘅血汗钱去提升自己民望系罪。愿上天怜悯他们，因为他们不知道自己在做什么！阿门。

　　切勿点燃心中火柴

　　1982年开始嘅信贷扩张期到2007年10月结束，前后共二十五年，未来调整期有几长？一年？你信唔信？虽然股票跌市香港可能喺10月完成、美股喺11月完成，但未来牛皮市相信十分漫长。漫漫长夜做乜好？

　　今年5月「投资者日记」突然暂停刊出两天，事因收到内地亲戚通知，内地政府正在拆掉我老曹爷爷嘅房子。自1950年同母亲离开中国后，我老曹曾返回上海多次，但宁波则一次都未返过去。2008年5月系我老曹首次返乡下，眼见祖屋已被政府拆咗一半，与政府官员交涉（因已冇屋契），才得知祖屋原来占地六百五十平方米（都几大）。我老曹离开祖屋五十多年，对其已冇乜印象，唯一记得系自己三岁嗰年，唔知同爷爷争拗乜嘢而被母亲关入柴房（祖屋系烧草及柴煮饭）。我老曹（当年系小曹也）唔知从边度弄来一根火柴，为咗同爷爷斗气，居然想放火烧屋；幸母亲及时发觉，将火救熄，并将我打至半死。如非母亲及时制止，我老曹可能喺1950年已将爷爷建成嘅祖屋一把火烧掉。

　　其实每个人内心深处都有一根火柴（或叫心魔）而不自知。七十年代我老曹打工嗰间投资公司，当年生意已做得很大，但老板唔知为乜嘢，忽然跑去美国游埠而唔理公司死活，刚好遇上1973年3月股灾，结果公司嘅投资一败涂地。过去几十年，亦眼见唔少朋友曾拥有幸福家庭，但丈夫忽然狂赌或结识另一异性，搞到翻天覆地。去年唔少上市公司高层忽然玩起Accumulator，累到今年公司损失惨重。人好多时就系咁非理性、顽固不冥、思想狭隘。当年我老曹仲细，为咗同爷爷斗气（今天已忘记斗乜嘢气），居然想一把火烧掉佢辛苦建成嘅房子。今天我老曹时常提点自己──千万不要燃着心中嗰根火柴（心魔），因为佢可以毁掉你一生所有。千万不要因一时冲动而做出一生悔恨嘅事。